adawat dil mein rakhte hain magar yari dikhate hain

adāvat dil meñ rakhte haiñ magar yaarī dikhāte haiñ

na jaane log bhī kyā kyā adākārī dikhāte haiñ

yaqīnan un kā jī bharne lagā hai mezbānī se

vo kuchh din se hameñ jaatī huī lorry dikhāte haiñ

ulajhnā hai hameñ banjar zamīnoñ kī haqīqat se

unheñ kyā vo to bas kāġhaz pe phulvārī dikhāte haiñ

madad karne se pahle tum haqīqat bhī parakh lenā

yahāñ par ādatan kuchh log lāchārī dikhāte haiñ

Darānā chāhte haiñ vo hameñ bhī dhamkiyāñ de kar

baḌe nādān haiñ paanī ko chingārī dikhāte haiñ

daraḳhtoñ kī hifāzat karne vaalo Dar nahīñ jaanā

dikhāne do agar kuchh sar-phire aarī dikhāte haiñ

himāqat qābil-e-tārīf hai un kī 'akelā' jī

hamīñ se kaam hai ham ko hī rañg-dārī dikhāte haiñ

adawat dil mein rakhte hain magar yari dikhate hain

na jaane log bhi kya kya adakari dikhate hain

yaqinan un ka ji bharne laga hai mezbani se

wo kuchh din se hamein jati hui lorry dikhate hain

ulajhna hai hamein banjar zaminon ki haqiqat se

unhen kya wo to bas kaghaz pe phulwari dikhate hain

madad karne se pahle tum haqiqat bhi parakh lena

yahan par aadatan kuchh log lachaari dikhate hain

Darana chahte hain wo hamein bhi dhamkiyan de kar

baDe nadan hain pani ko chingari dikhate hain

daraKHton ki hifazat karne walo Dar nahin jaana

dikhane do agar kuchh sar-phire aari dikhate hain

himaqat qabil-e-tarif hai un ki 'akela' ji

hamin se kaam hai hum ko hi rang-dari dikhate hain