ادب کا سانپ جو تنہائیوں سے لپٹا ہے

ادب کا سانپ جو تنہائیوں سے لپٹا ہے

مرے غرور کی پرچھائیوں سے لپٹا ہے

مری نظر میں وہ رعنائیوں سے لپٹا ہے

جو آج درد کی پروائیوں سے لپٹا ہے

وہی تو دیتا ہے اس غم کی بیل کو پانی

جو درد درد کی گہرائیوں سے لپٹا ہے

نہ جانے کب مرے گیتوں کی دھن ہوئی رخصت

بس ایک خواب سا شہنائیوں سے لپٹا ہے

دیار جاں تو اسے راز کی طرح رکھنا

مرا وجود جو اونچائیوں سے لپٹا ہے

حویلیوں کی صداؤں پہ کان کیا دھرتا

مرا یقین مرے بھائیوں سے لپٹا ہے