ادب کی آڑ میں قضیے بہت نکلتے ہیں

ادب کی آڑ میں قضیے بہت نکلتے ہیں

غزل کے شہر سے فتوے بہت نکلتے ہیں

نظر میں ہم نے بہت سے گلاب رکھ تو لیے

مگر اب آنکھ سے کانٹے بہت نکلتے ہیں

سنو لباس شرافت سنبھال کر رکھنا

سفید رنگ پہ دھبے بہت نکلتے ہیں

پرانے دوست جو کالج کے مل کے بیٹھیں تو

حسین چہروں کے چرچے بہت نکلتے ہیں

ہمارے ساتھ چلے ہو مگر یہ دھیان رہے

وفا کے راستے کچے بہت نکلتے ہیں

اس اک مقام پہ جانے کے راستے ہیں بہت

اس اک مقام سے رستے بہت نکلتے ہیں

ہر اک قبائے تعلق اتار دو دلبرؔ

اب ان لباسوں کے بخیے بہت نکلتے ہیں