adab ko itna gira rahe ho koi sunega to kya kahega

adab ko itnā girā rahe ho koī sunegā to kyā kahegā

suḳhan kī 'azmat ghaTā rahe ho koī sunegā to kyā kahegā

diyoñ kā nām-o-nishāñ miTā kar tum un kā ḳhūn-e-jigar milā kar

charāġh apnā jalā rahe ho koī sunegā to kyā kahegā

hamesha jis ne samāj meñ kī tumhāre 'aiboñ kī parda-poshī

usī pe tohmat lagā rahe ho koī sunegā to kyā kahegā

hai ghar meñ jis se ḳhudā kī rahmat hai jis ke qadmoñ ke nīche jannat

usī ko zahmat batā rahe ho koī sunegā to kyā kahegā

jinhoñ ne tum ko janam diyā hai paḌhā likhā kar baḌā kiyā hai

unheñ hī āñkheñ dikhā rahe ho koī sunegā to kyā kahegā

hai jin se shāḳh-e-vafā mahaktī hai jin ke ḳhuuñ meñ vatan-parastī

unheñ fasādī batā rahe ho koī sunegā to kyā kahegā

mohabbatoñ ke gulāb tum par hamesha ham ne kiye nichhāvar

hamīñ pe nashtar chalā rahe ho koī sunegā to kyā kahegā

masarratoñ ke diye jalā kar zarūratoñ kā galā dabā kar

ġhamoñ ko 'ālam' chhupā rahe ho koī sunegā to kyā kahegā

adab ko itna gira rahe ho koi sunega to kya kahega

suKHan ki 'azmat ghaTa rahe ho koi sunega to kya kahega

diyon ka nam-o-nishan miTa kar tum un ka KHun-e-jigar mila kar

charagh apna jala rahe ho koi sunega to kya kahega

hamesha jis ne samaj mein ki tumhaare 'aibon ki parda-poshi

usi pe tohmat laga rahe ho koi sunega to kya kahega

hai ghar mein jis se KHuda ki rahmat hai jis ke qadmon ke niche jannat

usi ko zahmat bata rahe ho koi sunega to kya kahega

jinhon ne tum ko janam diya hai paDha likha kar baDa kiya hai

unhen hi aankhen dikha rahe ho koi sunega to kya kahega

hai jin se shaKH-e-wafa mahakti hai jin ke KHun mein watan-parasti

unhen fasadi bata rahe ho koi sunega to kya kahega

mohabbaton ke gulab tum par hamesha hum ne kiye nichhawar

hamin pe nashtar chala rahe ho koi sunega to kya kahega

masarraton ke diye jala kar zaruraton ka gala daba kar

ghamon ko 'alam' chhupa rahe ho koi sunega to kya kahega