adab se shikwa-e-gham ho raha hai

adab se shikva-e-ġham ho rahā hai

zabāñ ḳhāmosh hai dil ro rahā hai

jigar betāb hai dil ro rahā hai

tamannāoñ kā mātam ho rahā hai

zamāna laakh de chhīñTe pe chhīñTe

maiñ kyā jāgūñ muqaddar so rahā hai

samajhtā hai vo jannat kī haqīqat

tirī mahfil meñ dam-bhar jo rahā hai

jabīñ apnī kisī kā āstāñ hai

muqaddar ab muqaddar ho rahā hai

dil-e-nā-fahm ye aañsū nahīñ haiñ

baḌe nāyāb motī kho rahā hai

mohabbat-rez fitrat ban rahī hai

qayāmat-ḳhez aalam ho rahā hai

nayā andāz hai uzr-e-sitam kā

mujhī se merā shikva ho rahā hai

shab-e-ġham aur sukūn-e-qalb-e-muztar

mujhe kuchh aur hī shak ho rahā hai

yahāñ tak rāz-e-dil ham ne chhupāyā

zamāne meñ fasāna ho rahā hai

ilāhī shān-e-sattārī kā sadqa

shumār-e-ma.asiyat kyoñ ho rahā hai

inhī āñkhoñ meñ jannat bas rahī hai

inhī āñkhoñ meñ mahshar so rahā hai

dabe paañv guzar jaa.e qayāmat

koī barsoñ kā jaagā so rahā hai

ye dard-e-dil 'munīr' un kā karam hai

maqām-e-shukr hai tū ro rahā hai

adab se shikwa-e-gham ho raha hai

zaban KHamosh hai dil ro raha hai

jigar betab hai dil ro raha hai

tamannaon ka matam ho raha hai

zamana lakh de chhinTe pe chhinTe

main kya jagun muqaddar so raha hai

samajhta hai wo jannat ki haqiqat

teri mahfil mein dam-bhar jo raha hai

jabin apni kisi ka aastan hai

muqaddar ab muqaddar ho raha hai

dil-e-na-fahm ye aansu nahin hain

baDe nayab moti kho raha hai

mohabbat-rez fitrat ban rahi hai

qayamat-KHez aalam ho raha hai

naya andaz hai uzr-e-sitam ka

mujhi se mera shikwa ho raha hai

shab-e-gham aur sukun-e-qalb-e-muztar

mujhe kuchh aur hi shak ho raha hai

yahan tak raaz-e-dil hum ne chhupaya

zamane mein fasana ho raha hai

ilahi shan-e-sattari ka sadqa

shumar-e-masiyat kyon ho raha hai

inhi aankhon mein jannat bas rahi hai

inhi aankhon mein mahshar so raha hai

dabe panw guzar jae qayamat

koi barson ka jaga so raha hai

ye dard-e-dil 'munir' un ka karam hai

maqam-e-shukr hai tu ro raha hai