adhura apni hi zindagi ka hisab Thahra

adhūrā apnī hī zindagī kā hisāb Thahrā

jo chāhe paḌh le hamārā chehrā kitāb Thahrā

sunā thā kānoñ se jo bhī us ne vo sab haqīqat

hamārī āñkhoñ ne jo bhī dekhā vo ḳhvāb Thahrā

ikaTThā zar kar liyā hai us ne bhī apne ghar meñ

razīl jitnā thā utnā izzat-ma.āb Thahrā

sunā hai maiñ ne vo shaḳhs bhī ban gayā hai achchhā

milūñgā kaise ki maiñ to āḳhir ḳharāb Thahrā

ġharīb har koī nāchtā hai unhīñ kī dhun par

ye dast-e-ahl-e-arab meñ kaisā rabāb Thahrā

kiyā hai ehsān maut ne dī najāt mujh ko

shikāyatoñ kā bhī ḳhatm 'saifī' lo baab Thahrā

adhura apni hi zindagi ka hisab Thahra

jo chahe paDh le hamara chehra kitab Thahra

suna tha kanon se jo bhi us ne wo sab haqiqat

hamari aankhon ne jo bhi dekha wo KHwab Thahra

ikaTTha zar kar liya hai us ne bhi apne ghar mein

razil jitna tha utna izzat-maab Thahra

suna hai main ne wo shaKHs bhi ban gaya hai achchha

milunga kaise ki main to aaKHir KHarab Thahra

gharib har koi nachta hai unhin ki dhun par

ye dast-e-ahl-e-arab mein kaisa rabab Thahra

kiya hai ehsan maut ne di najat mujh ko

shikayaton ka bhi KHatm 'saifi' lo bab Thahra