ادھورا عشق رہتا ہے مکمل کیوں نہیں ہوتا

ادھورا عشق رہتا ہے مکمل کیوں نہیں ہوتا

کبھی پیاسے لبوں کے پاس بادل کیوں نہیں ہوتا

مہکتا ہی رہے دل میں ہمیشہ ایک سا موسم

نگاہوں میں بسا ہر خواب صندل کیوں نہیں ہوتا

کبھی فرصت ملے تو پاس بیٹھیں زندگی جی لیں

ٹھہر جائے ذرا سا وہ حسیں پل کیوں نہیں ہوتا

ہری ہو شاخ یادوں کی کھلے ہوں پھول ڈالی پر

جدھر دیکھوں ادھر گلزار جنگل کیوں نہیں ہوتا

محبت میں نہیں دکھتی عبادت وہ پرانی سی

زمانہ میں کہیں اب کوئی پاگل کیوں نہیں ہوتا