adhuri qurbaton ke KHwab aankhon ko dikha jaana

adhūrī qurbatoñ ke ḳhvāb āñkhoñ ko dikhā jaanā

hazāroñ dūriyoñ par ye tirā kuchh paas aa jaanā

udāsī ke dhuñdlakoñ kā dimāġh-o-dil pe chhā jaanā

nazar ke sāmne ik gum-shuda manzar kā aa jaanā

sunī hai maiñ ne aksar band darvāzoñ kī sargoshī

sadā.eñ chāhtī haiñ sab khulī saḌkoñ pe aa jaanā

tirī yādeñ ki is tūfān-e-zulmat meñ bhī raushan haiñ

huā mushkil havā ko in charāġhoñ kā bujhā jaanā

ḳhalā meñ Dūbtī sī āhaTeñ thiiñ kuchh jinheñ ham ne

safar meñ saath rakkhā manziloñ kā aasrā jaanā

maiñ tere saath huuñ to us kī ḳhushbū ke ta'āqub meñ

jahāñ tak jā sake ai sar-phirī mauj-e-havā jaanā

nazar us kī bhī ai 'maḳhmūr' dhokā khā ga.ī āḳhir

vahī thā āshnā chehra jise nā-āshnā jaanā

adhuri qurbaton ke KHwab aankhon ko dikha jaana

hazaron duriyon par ye tera kuchh pas aa jaana

udasi ke dhundlakon ka dimagh-o-dil pe chha jaana

nazar ke samne ek gum-shuda manzar ka aa jaana

suni hai main ne aksar band darwazon ki sargoshi

sadaen chahti hain sab khuli saDkon pe aa jaana

teri yaaden ki is tufan-e-zulmat mein bhi raushan hain

hua mushkil hawa ko in charaghon ka bujha jaana

KHala mein Dubti si aahaTen thin kuchh jinhen hum ne

safar mein sath rakkha manzilon ka aasra jaana

main tere sath hun to us ki KHushbu ke ta'aqub mein

jahan tak ja sake ai sar-phiri mauj-e-hawa jaana

nazar us ki bhi ai 'maKHmur' dhoka kha gai aaKHir

wahi tha aashna chehra jise na-ashna jaana