adu ka zikr nahin doston ka nam nahin

adū kā zikr nahīñ dostoñ kā naam nahīñ

zabāñ pe aaj koī harf-e-intiqām nahīñ

dar-o-darīcha ke dāġh-o-charāġh apnī jagah

mujhe jalā ke na guzrī to shaam shaam nahīñ

chalo Thahar nahīñ sakte guzar to sakte ho

kahīñ kahīñ se shikasta hai dil tamām nahīñ

jise pukārte phirte haiñ kū-ba-kū ham log

vo ek ahd-e-tamannā hai sirf naam nahīñ

ye ḳhāk-dān-e-ta'alluq hai pesh-o-pas meñ na jā

husūl-e-ātish-o-āb-o-havā mudām nahīñ

ka.ī bujhe hue sīnoñ ko aag hai darkār

zabāñ pe naam tumhārā barā.e-nām nahīñ

adu ka zikr nahin doston ka nam nahin

zaban pe aaj koi harf-e-intiqam nahin

dar-o-daricha ke dagh-o-charagh apni jagah

mujhe jala ke na guzri to sham sham nahin

chalo Thahar nahin sakte guzar to sakte ho

kahin kahin se shikasta hai dil tamam nahin

jise pukarte phirte hain ku-ba-ku hum log

wo ek ahd-e-tamanna hai sirf nam nahin

ye KHak-dan-e-ta'alluq hai pesh-o-pas mein na ja

husul-e-atish-o-ab-o-hawa mudam nahin

kai bujhe hue sinon ko aag hai darkar

zaban pe nam tumhaara barae-nam nahin