adu ke kahne se mujhko zalil-o-KHwar kiya

adū ke kahne se mujh ko zalīl-o-ḳhvār kiyā

sazā ye us kī hai maiñ ne jo tum ko pyaar kiyā

na hogā dāvar-e-mahshar ke aage hashr meñ bhī

ki umr bhar usī kāfir ko maiñ ne pyaar kiyā

ham aur beach meñ aate haiñ un kī bātoñ ke

unhoñ ne va.ada kiyā ham ne e'tibār kiyā

batā to charḳh bhalā us se tujh ko kyā hāsil

kisī kā sheva-e-zātī jo iḳhtiyār kiyā

mazā yahī hai ki tarfain se hue be chīnī

mire taḌapne ne un ko bhī be-qarār kiyā

hamārī na.ash ko Thokar lagā ke us ne kahā

hamāre aane kā kyā ḳhuub intizār kiyā

burā kiyā jo kahā un se mudda.ā dil kā

ġhazab kiyā jo mohabbat ko āshkār kiyā

adu ke kahne se mujh ko zalil-o-KHwar kiya

saza ye us ki hai main ne jo tum ko pyar kiya

na hoga dawar-e-mahshar ke aage hashr mein bhi

ki umr bhar usi kafir ko main ne pyar kiya

hum aur beach mein aate hain un ki baaton ke

unhon ne wada kiya hum ne e'tibar kiya

bata to charKH bhala us se tujh ko kya hasil

kisi ka shewa-e-zati jo iKHtiyar kiya

maza yahi hai ki tarfain se hue be chini

mere taDapne ne un ko bhi be-qarar kiya

hamari nash ko Thokar laga ke us ne kaha

hamare aane ka kya KHub intizar kiya

bura kiya jo kaha un se muddaa dil ka

ghazab kiya jo mohabbat ko aashkar kiya