adu ki bazm mein ai bazm ye shab to basar kar lo

adū kī bazm meñ ai 'bazm' ye shab to basar kar lo

agar dekhā nahīñ jaatā to muñh apnā udhar kar lo

evaz ulfat ke dil hai faisla bāham-digar kar lo

razā ke saath hai saudā na Dar kar do na Dar kar lo

bigaḌne kā bhalā hai vasl kī sohbat meñ kyā mauqa

badī ye kab thī aise meñ tum apnā muñh udhar kar lo

fanā honā hai jab ġham aur ḳhushī phir sab barābar hai

jahāñ meñ chaar din kī ziist kaisī hī basar kar lo

ḳhushā-shoḳhī dupaTTa jab haTā siine se farmāyā

tumheñ merī qasam hai muñh na apnā gar udhar kar lo

jab apne ġham kā qissa baiThtā huuñ un se kahne ko

to kahte haiñ lab apne ḳhushk kar lo chashm tar kar lo

ishāre par tumhāre chal rahā hai ālam-e-imkāñ

usī jānib ho sab kā ruḳh tum apnā muñh jidhar kar lo

shikāyat jab kabhī jaur-o-jafā kī un se kartā huuñ

to saḳhtī se ye farmāte haiñ patthar kā jigar kar lo

bharosa us kī rahmat par hai jab zāhid to phir kyā hai

hasīnoñ ko to zinda rah ke lo hūroñ ko mar kar lo

bahut kār-e-aham hai kāTnā āshiq kī gardan kā

uThāo teġh phir pahle nazākat par nazar kar lo

pahuñch kar sāmne un ke na phir āvāz niklegī

yahāñ ai hazrat-e-dil jitnā chāho shor-o-shar kar lo

tumhārā yaañ se jaanā 'bazm' se dekhā na jā.egā

sahar furqat kī aa pahuñchī abhī se muñh udhar kar lo

adu ki bazm mein ai 'bazm' ye shab to basar kar lo

agar dekha nahin jata to munh apna udhar kar lo

ewaz ulfat ke dil hai faisla baham-digar kar lo

raza ke sath hai sauda na Dar kar do na Dar kar lo

bigaDne ka bhala hai wasl ki sohbat mein kya mauqa

badi ye kab thi aise mein tum apna munh udhar kar lo

fana hona hai jab gham aur KHushi phir sab barabar hai

jahan mein chaar din ki zist kaisi hi basar kar lo

KHusha-shoKHi dupaTTa jab haTa sine se farmaya

tumhein meri qasam hai munh na apna gar udhar kar lo

jab apne gham ka qissa baiThta hun un se kahne ko

to kahte hain lab apne KHushk kar lo chashm tar kar lo

ishaare par tumhaare chal raha hai aalam-e-imkan

usi jaanib ho sab ka ruKH tum apna munh jidhar kar lo

shikayat jab kabhi jaur-o-jafa ki un se karta hun

to saKHti se ye farmate hain patthar ka jigar kar lo

bharosa us ki rahmat par hai jab zahid to phir kya hai

hasinon ko to zinda rah ke lo huron ko mar kar lo

bahut kar-e-aham hai kaTna aashiq ki gardan ka

uThao tegh phir pahle nazakat par nazar kar lo

pahunch kar samne un ke na phir aawaz niklegi

yahan ai hazrat-e-dil jitna chaho shor-o-shar kar lo

tumhaara yan se jaana 'bazm' se dekha na jaega

sahar furqat ki aa pahunchi abhi se munh udhar kar lo