afsana-e-hayat ko dohra raha hun main

afsāna-e-hayāt ko dohrā rahā huuñ maiñ

yuuñ apnī umr-e-rafta ko lauTā rahā huuñ maiñ

ik ik qadam pe dars-e-vafā de rahā huuñ maiñ

ye kis kī justujū hai kidhar jā rahā huuñ maiñ

yā rab kisī kā dām-e-hasīñ muntazir na ho

par shauq ke lage haiñ uḌā jā rahā huuñ maiñ

is sehr-e-rañg-o-bū ne to dīvāna kar diyā

dāman ke taar taar ko uljhā rahā huuñ maiñ

soz-e-darūn-e-sīna ko naġhmoñ meñ Dhaal kar

sāz-e-nafas ke taar ko barmā rahā huuñ maiñ

rāh-e-talab meñ dekh mire dil kī hasrateñ

saaye meñ pā-e-ḳhizr ko sahlā rahā huuñ maiñ

raste kī uuñch niich se vāqif to huuñ 'amīñ'

Thokar qadam qadam pe magar khā rahā huuñ maiñ

afsana-e-hayat ko dohra raha hun main

yun apni umr-e-rafta ko lauTa raha hun main

ek ek qadam pe dars-e-wafa de raha hun main

ye kis ki justuju hai kidhar ja raha hun main

ya rab kisi ka dam-e-hasin muntazir na ho

par shauq ke lage hain uDa ja raha hun main

is sehr-e-rang-o-bu ne to diwana kar diya

daman ke tar tar ko uljha raha hun main

soz-e-darun-e-sina ko naghmon mein Dhaal kar

saz-e-nafas ke tar ko barma raha hun main

rah-e-talab mein dekh mere dil ki hasraten

saye mein pa-e-KHizr ko sahla raha hun main

raste ki unch nich se waqif to hun 'amin'

Thokar qadam qadam pe magar kha raha hun main