afsos bani hi nahin pahchan abhi tak

afsos banī hī nahīñ pahchān abhī tak

har ahl-e-nazar mujh se hai anjān abhī tak

sadiyoñ ke taġhayyur se banī sūrat-e-insāñ

insān nahīñ hai magar insān abhī tak

ilhām se ib.hām se īhām se chhūTe

kitne haiñ ḳhayālāt pareshān abhī tak

kitne hī khule fahm-o-farāsat ke darīche

haiñ qaid-e-jahālat meñ ham insān abhī tak

haiñ dair-o-haram kuchh ki nahīñ dair-o-haram kuchh

Thahrā nahīñ merā kahīñ īmān abhī tak

ham ahl-e-tazabzub kā fasāna bhī ajab hai

kāfir hī bane haiñ na musalmān abhī tak

taskīn kī sūrat koī miltī nahīñ 'āzam'

merī nigah-e-shauq hai hairān abhī tak

afsos bani hi nahin pahchan abhi tak

har ahl-e-nazar mujh se hai anjaan abhi tak

sadiyon ke taghayyur se bani surat-e-insan

insan nahin hai magar insan abhi tak

ilham se ibham se iham se chhuTe

kitne hain KHayalat pareshan abhi tak

kitne hi khule fahm-o-farasat ke dariche

hain qaid-e-jahaalat mein hum insan abhi tak

hain dair-o-haram kuchh ki nahin dair-o-haram kuchh

Thahra nahin mera kahin iman abhi tak

hum ahl-e-tazabzub ka fasana bhi ajab hai

kafir hi bane hain na musalman abhi tak

taskin ki surat koi milti nahin 'azam'

meri nigah-e-shauq hai hairan abhi tak