afsos uske hath mein KHanjar laga mujhe

afsos us ke haath meñ ḳhanjar lagā mujhe

jo shaḳhs apnī jaan se baḌh kar lagā mujhe

maiñ gir rahā thā dard kī shiddat se jā-ba-jā

saaqī ne jaam baḳhshā to behtar lagā mujhe

na chaah kar bhī aa gayā maidān-e-jang meñ

mere ḳhilāf jab mirā lashkar lagā mujhe

ik pal ko bhī sukūn na hāsil huā vahāñ

shahroñ se achchhā gaañv kā chhappar lagā mujhe

ta.ana-zanī se ho ga.e nāsūr qalb meñ

lahja mire raqīb kā nashtar lagā mujhe

tharrā rahā thā ḳhauf se jis dam mirā badan

tab june kā mahīna december lagā mujhe

ġhāfil huuñ nek kaam se ai nafs rahm kar

achchhā.iyoñ kī raah pe lā kar lagā mujhe

ab bhī qalam ravāñ hai zamāne guzar ga.e

terā vajūd fikr kā 'mehvar' lagā mujhe

afsos us ke hath mein KHanjar laga mujhe

jo shaKHs apni jaan se baDh kar laga mujhe

main gir raha tha dard ki shiddat se ja-ba-ja

saqi ne jam baKHsha to behtar laga mujhe

na chah kar bhi aa gaya maidan-e-jang mein

mere KHilaf jab mera lashkar laga mujhe

ek pal ko bhi sukun na hasil hua wahan

shahron se achchha ganw ka chhappar laga mujhe

tana-zani se ho gae nasur qalb mein

lahja mere raqib ka nashtar laga mujhe

tharra raha tha KHauf se jis dam mera badan

tab june ka mahina december laga mujhe

ghafil hun nek kaam se ai nafs rahm kar

achchhaiyon ki rah pe la kar laga mujhe

ab bhi qalam rawan hai zamane guzar gae

tera wajud fikr ka 'mehwar' laga mujhe