afsurdagi-e-dard-e-faraqat hai sahar tak

afsurdagī-e-dard-e-farāqat hai sahar tak

ye shaam to ik shām-e-qayāmat hai sahar tak

koī to añdheroñ meñ ujāloñ kā sabab ho

maanā ki charāġhoñ kī haqīqat hai sahar tak

ab ham pe jo aa.ī to kisī taur na guzrī

sunte the shab-e-ġham kī tavālat hai sahar tak

phir raakh bhī ho jaa.eñ to ho jaa.eñ balā se

āñkhoñ ke havāloñ kī zarūrat hai sahar tak

jis raat khulā mujh pe vo mahtāb kī sūrat

vo raat sitāroñ kī amānat hai sahar tak

sūraj pe hukūmat hai yahāñ dīda-varoñ kī

sīnoñ kī sulagne kī ijāzat hai sahar tak

gūñjegā har ik halqa-e-zanjīr-e-asīrāñ

ḳhāmoshī-e-zindāñ kī aziyyat hai sahar tak

ye raqs-e-balā sāz-e-junūñ-ḳhez pe 'az.har'

ye mahfil-e-hañgāma-e-vahshat hai sahar tak

afsurdagi-e-dard-e-faraqat hai sahar tak

ye sham to ek sham-e-qayamat hai sahar tak

koi to andheron mein ujalon ka sabab ho

mana ki charaghon ki haqiqat hai sahar tak

ab hum pe jo aai to kisi taur na guzri

sunte the shab-e-gham ki tawalat hai sahar tak

phir rakh bhi ho jaen to ho jaen bala se

aankhon ke hawalon ki zarurat hai sahar tak

jis raat khula mujh pe wo mahtab ki surat

wo raat sitaron ki amanat hai sahar tak

suraj pe hukumat hai yahan dida-waron ki

sinon ki sulagne ki ijazat hai sahar tak

gunjega har ek halqa-e-zanjir-e-asiran

KHamoshi-e-zindan ki aziyyat hai sahar tak

ye raqs-e-bala saz-e-junun-KHez pe 'azhar'

ye mahfil-e-hangama-e-wahshat hai sahar tak