افسردگی کا رنگ نمایاں ہنسی میں ہے

افسردگی کا رنگ نمایاں ہنسی میں ہے

یعنی کہ ایک غم کی جھلک بھی خوشی میں ہے

میرے جنون شوق کی عظمت نہ پوچھئے

ان کی خودی کی شان مری بے خودی میں ہے

کعبہ کو دیر دیر کو کعبہ سمجھ لیا

اتنا تو ہوش رسم و رہ عاشقی میں ہے

مجھ کو سنبھالتا ہے جو نادیدہ طور پر

شامل یہ آج کون مری بیکسی میں ہے

وارفتۂ مذاق خودی کو کہاں نصیب

وہ کیف مستقل جو مری بے خودی میں ہے

محسوس کر رہا ہوں کچھ ایسا ترے بغیر

جیسے کہ اک کمی سی مری زندگی میں ہے

کیا کیجئے گا عمر ابد مانگ کر حزیںؔ

جینے کا لطف زندگیٔ عارضی میں ہے