afsurdagi ka rang numayan hansi mein hai

afsurdagī kā rang numāyāñ hañsī meñ hai

yā'nī ki ek ġham kī jhalak bhī ḳhushī meñ hai

mere junūn-e-shauq kī 'azmat na pūchhiye

un kī ḳhudī kī shaan mirī be-ḳhudī meñ hai

kā'ba ko dair dair ko kā'ba samajh liyā

itnā to hosh rasm-o-rah-e-‘āshiqī meñ hai

mujh ko sañbhāltā hai jo nādīda taur par

shāmil ye aaj kaun mirī bekasī meñ hai

vārafta-e-mazāq-e-ḳhudī ko kahāñ nasīb

vo kaif-e-mustaqil jo mirī be-ḳhudī meñ hai

mahsūs kar rahā huuñ kuchh aisā tire baġhair

jaise ki ik kamī sī mirī zindagī meñ hai

kyā kījiyegā ‘umr-e-abad maañg kar 'hazīñ'

jiine kā lutf zindagī-e-'ārzī meñ hai

afsurdagi ka rang numayan hansi mein hai

ya'ni ki ek gham ki jhalak bhi KHushi mein hai

mere junun-e-shauq ki 'azmat na puchhiye

un ki KHudi ki shan meri be-KHudi mein hai

ka'ba ko dair dair ko ka'ba samajh liya

itna to hosh rasm-o-rah-e-‘ashiqi mein hai

mujh ko sanbhaalta hai jo nadida taur par

shamil ye aaj kaun meri bekasi mein hai

warafta-e-mazaq-e-KHudi ko kahan nasib

wo kaif-e-mustaqil jo meri be-KHudi mein hai

mahsus kar raha hun kuchh aisa tere baghair

jaise ki ek kami si meri zindagi mein hai

kya kijiyega ‘umr-e-abad mang kar 'hazin'

jine ka lutf zindagi-e-'arzi mein hai