afsun pahli barish ka

afsūñ pahlī bārish kā

ik dhultā lafz nigārish kā

ik chehra aks bahāroñ kā

ik ā.īna ruḳhsāroñ kā

ik ḳhema-e-abr duāoñ kā

ik saaya narm ridāoñ kā

ik khel purānā chāhat kā

ik dard bahāna rāhat kā

ik peḌ ghanerī yādoñ kā

ik mahkā baaġh murādoñ kā

ik ghar nīchī dīvāroñ kā

ik ziina chāñd-sitāroñ kā

ik album husn jazīroñ kā

ik sarmāya tasvīroñ kā

ik taptā sonā tan-man kā

ik chaḌhtā dariyā joban kā

ik jagmag manzar yādoñ kā

ik jaltā diip irādoñ kā

ik taa.ir duur jahānoñ kā

ik sūrat-gar imkānoñ kā

ik daur ajab nādānī kā

ik rañgīñ moḌ kahānī kā

ik gol chahaktī chiḌiyoñ kā

ik narm bichhaunā guḌiyoñ kā

ik shor ujaḌte shahroñ kā

ik rañj simaTtī nahroñ kā

ik Dhaltā sūraj bastī kā

ik suunā āñgan hastī kā

ik thamtā saaz azānoñ kā

ik baḌhtā shor dukānoñ kā

ik raavī agle vaqtoñ kā

ik nauhagar ḳhush-baḳhtoñ kā

ik mub.ham lafz ibārat kā

ik raushan bol hikāyat kā

ik gherā gorī bāñhoñ kā

ik Derā narm panāhoñ kā

ik Thahrā pul barsātoñ kā

ik jaadū kaalī rātoñ kā

ik Dher lagegā īñToñ kā

ik taḳht Thikāna beToñ kā

ik vīrāna gulzāroñ kā

ik ret-nagar āsāroñ kā

ik uḌtā rañg mināroñ kā

ik daam fanā ke tāroñ kā

ik sannāTā fariyādoñ kā

ik qahr sitam-ījādoñ kā

ik ḳhālī jaam haqīqat kā

ik sachchā naam mohabbat kā

afsun pahli barish ka

ek dhulta lafz nigarish ka

ek chehra aks bahaaron ka

ek aaina ruKHsaron ka

ek KHema-e-abr duaon ka

ek saya narm ridaon ka

ek khel purana chahat ka

ek dard bahana rahat ka

ek peD ghaneri yaadon ka

ek mahka bagh muradon ka

ek ghar nichi diwaron ka

ek zina chand-sitaron ka

ek album husn jaziron ka

ek sarmaya taswiron ka

ek tapta sona tan-man ka

ek chaDhta dariya joban ka

ek jagmag manzar yaadon ka

ek jalta dip iradon ka

ek tair dur jahanon ka

ek surat-gar imkanon ka

ek daur ajab nadani ka

ek rangin moD kahani ka

ek gol chahakti chiDiyon ka

ek narm bichhauna guDiyon ka

ek shor ujaDte shahron ka

ek ranj simaTti nahron ka

ek Dhalta suraj basti ka

ek suna aangan hasti ka

ek thamta saz azanon ka

ek baDhta shor dukanon ka

ek rawi agle waqton ka

ek nauhagar KHush-baKHton ka

ek mubham lafz ibarat ka

ek raushan bol hikayat ka

ek ghera gori banhon ka

ek Dera narm panahon ka

ek Thahra pul barsaton ka

ek jadu kali raaton ka

ek Dher lagega inTon ka

ek taKHt Thikana beTon ka

ek virana gulzaron ka

ek ret-nagar aasaron ka

ek uDta rang minaron ka

ek dam fana ke taron ka

ek sannaTa fariyaadon ka

ek qahr sitam-ijadon ka

ek KHali jam haqiqat ka

ek sachcha nam mohabbat ka