افسوں پہلی بارش کا
افسوں پہلی بارش کا
اک دھلتا لفظ نگارش کا
اک چہرہ عکس بہاروں کا
اک آئینہ رخساروں کا
اک خیمۂ ابر دعاؤں کا
اک سایہ نرم رداؤں کا
اک کھیل پرانا چاہت کا
اک درد بہانہ راحت کا
اک پیڑ گھنیری یادوں کا
اک مہکا باغ مرادوں کا
اک گھر نیچی دیواروں کا
اک زینہ چاند ستاروں کا
اک البم حسن جزیروں کا
اک سرمایہ تصویروں کا
اک تپتا سونا تن من کا
اک چڑھتا دریا جوبن کا
اک جگ مگ منظر یادوں کا
اک جلتا دیپ ارادوں کا
اک طائر دور جہانوں کا
اک صورت گر امکانوں کا
اک دور عجب نادانی کا
اک رنگیں موڑ کہانی کا
اک گول چہکتی چڑیوں کا
اک نرم بچھونا گڑیوں کا
اک شور اجڑتے شہروں کا
اک رنج سمٹتی نہروں کا
اک ڈھلتا سورج بستی کا
اک سونا آنگن ہستی کا
اک تھمتا ساز اذانوں کا
اک بڑھتا شور دکانوں کا
اک راوی اگلے وقتوں کا
اک نوحہ گر خوش بختوں کا
اک مبہم لفظ عبارت کا
اک روشن بول حکایت کا
اک گھیرا گوری بانہوں کا
اک ڈیرا نرم پناہوں کا
اک ٹھہرا پل برساتوں کا
اک جادو کالی راتوں کا
اک ڈھیر لگے گا اینٹوں کا
اک تخت ٹھکانہ بیٹوں کا
اک ویرانہ گلزاروں کا
اک ریت نگر آثاروں کا
اک اڑتا رنگ مناروں کا
اک دام فنا کے تاروں کا
اک سناٹا فریادوں کا
اک قہر ستم ایجادوں کا
اک خالی جام حقیقت کا
اک سچا نام محبت کا
Additional information available
Click on the INTERESTING button to view additional information associated with this sher.
About this sher
Lorem ipsum dolor sit amet, consectetur adipiscing elit. Morbi volutpat porttitor tortor, varius dignissim.
rare Unpublished content
This ghazal contains ashaar not published in the public domain. These are marked by a red line on the left.
