agar aah-e-rasa se kaam hum na-kaam lete hain

agar āh-e-rasā se kaam ham nā-kām lete haiñ

farishte pāya-e-arsh-e-mo.allā thaam lete haiñ

butoñ par koī mar jaa.e qazā kā naam lete haiñ

ye kāfir apne uupar kab koī ilzām lete haiñ

butoñ ke zikr par 'kaifī' kaleja thaam lete haiñ

koī pūchhe isī muñh se ḳhudā kā naam lete haiñ

asar merī vafā kā baa'd mere ye huā un par

mirā jab naam aatā hai kaleja thaam lete haiñ

tire armān dil meñ aa ke jam jaate haiñ kuchh aise

nikālo to nikalne kā nahīñ phir naam lete haiñ

paḌā rahne do apne sāya-e-dīvār meñ dam bhar

tumhāre dil-jale thak kar zarā ārām lete haiñ

havā hai abr hai gulzār hai mutrib hai saaqī hai

maza sāvan kā lete haiñ to mai-āshām lete haiñ

tumhārī bad-gumānī hī tumheñ badnām kartī hai

tumhāre marne vaale kab tumhārā naam lete haiñ

luTere haiñ hasīñ māshūq un ko kaun kahtā hai

zabardastī ye gāhak jin se dil be-dām lete haiñ

matā-e-dil ke badle bosa-e-lab kyoñ na leñ āshiq

ki chokhā maal dete haiñ karāre daam lete haiñ

tire naqsh-e-qadam ko chhū ke sar par kaun aafat le

hazāroñ fitna-e-mahshar yahāñ ārām lete haiñ

ham apne ghar meñ bāteñ karte haiñ tum ko ḳhalish kyoñ hai

shikāyat dil se karte haiñ kisī kā naam lete haiñ

ḳhushī manzūr hai un kī zabāñ se kuchh nahīñ kahte

na pūchho dil pe kyā kyā morid-e-ālām lete haiñ

agar aah-e-rasa se kaam hum na-kaam lete hain

farishte paya-e-arsh-e-moalla tham lete hain

buton par koi mar jae qaza ka nam lete hain

ye kafir apne upar kab koi ilzam lete hain

buton ke zikr par 'kaifi' kaleja tham lete hain

koi puchhe isi munh se KHuda ka nam lete hain

asar meri wafa ka ba'd mere ye hua un par

mera jab nam aata hai kaleja tham lete hain

tere arman dil mein aa ke jam jate hain kuchh aise

nikalo to nikalne ka nahin phir nam lete hain

paDa rahne do apne saya-e-diwar mein dam bhar

tumhaare dil-jale thak kar zara aaram lete hain

hawa hai abr hai gulzar hai mutrib hai saqi hai

maza sawan ka lete hain to mai-asham lete hain

tumhaari bad-gumani hi tumhein badnam karti hai

tumhaare marne wale kab tumhaara nam lete hain

luTere hain hasin mashuq un ko kaun kahta hai

zabardasti ye gahak jin se dil be-dam lete hain

mata-e-dil ke badle bosa-e-lab kyon na len aashiq

ki chokha mal dete hain karare dam lete hain

tere naqsh-e-qadam ko chhu ke sar par kaun aafat le

hazaron fitna-e-mahshar yahan aaram lete hain

hum apne ghar mein baaten karte hain tum ko KHalish kyon hai

shikayat dil se karte hain kisi ka nam lete hain

KHushi manzur hai un ki zaban se kuchh nahin kahte

na puchho dil pe kya kya morid-e-alam lete hain