agar ai nasim-e-sahar tera ho guzar dayar-e-hijaz mein

agar ai nasīm-e-sahar tirā ho guzar dayār-e-hijāz meñ

mirī chashm-e-tar kā salām kahnā huzūr-e-banda-navāz meñ

tumheñ hadd-e-aql na pā sakī faqat itnā haal batā sakī

ki tum ek jalva-e-rāz the jo ayaañ thā rañg-e-hijāz meñ

ajab ik surūr sā chhā gayā merī rūh-o-dil meñ samā gayā

tirā naam naaz se aa gayā mire lab pe jab bhī namāz meñ

na jahāñ meñ rāhat-e-jāñ milī na matā-e-amn-o-amāñ milī

jo davā-e-dard-e-nihāñ milī to milī bahisht-e-hijāz meñ

karūñ nazr naġhma-e-jāñ-fazā maiñ kahāñ se 'aḳhtar'-e-ġham-navā

ki sivā.e nāla-e-ġham nahīñ mire dil ke ġham-zada saaz meñ

agar ai nasim-e-sahar tera ho guzar dayar-e-hijaz mein

meri chashm-e-tar ka salam kahna huzur-e-banda-nawaz mein

tumhein hadd-e-aql na pa saki faqat itna haal bata saki

ki tum ek jalwa-e-raaz the jo ayan tha rang-e-hijaz mein

ajab ek surur sa chha gaya meri ruh-o-dil mein sama gaya

tera nam naz se aa gaya mere lab pe jab bhi namaz mein

na jahan mein rahat-e-jaan mili na mata-e-amn-o-aman mili

jo dawa-e-dard-e-nihan mili to mili bahisht-e-hijaz mein

karun nazr naghma-e-jaan-faza main kahan se 'aKHtar'-e-gham-nawa

ki siwae nala-e-gham nahin mere dil ke gham-zada saz mein