agar bulandi ka meri wo etiraf kare

agar bulandī kā merī vo e'tirāf kare

to phir zarūrī hai aa kar yahāñ tavāf kare

diloñ meñ ḳhvāhish-e-dīdār ho to lāzim hai

jo aa.ina bhī mayassar ho us ko saaf kare

rahūñgā maiñ to hamesha qasīda-ḳhvāñ us kā

zamīñ falak se bhalā kaise iḳhtilāf kare

hisār-e-zāt se bāhar nikalnā ho jis ko

anā kī āhanī dīvār meñ shigāf kare

jahāñ bhī qadr-shanāsī meñ kuchh kamī dekhe

vahāñ zarūrī hai ḳhud bhī kuchh inkishāf kare

purāne vaqtoñ ke kuchh log ab bhī kahte haiñ

baḌā vahī hai jo dushman ko bhī muaaf kare

vo merā dost bhī munsif bhī hai magar 'aḳhtar'

har ek faisla mere hī kyuuñ ḳhilāf kare

agar bulandi ka meri wo e'tiraf kare

to phir zaruri hai aa kar yahan tawaf kare

dilon mein KHwahish-e-didar ho to lazim hai

jo aaina bhi mayassar ho us ko saf kare

rahunga main to hamesha qasida-KHwan us ka

zamin falak se bhala kaise iKHtilaf kare

hisar-e-zat se bahar nikalna ho jis ko

ana ki aahani diwar mein shigaf kare

jahan bhi qadr-shanasi mein kuchh kami dekhe

wahan zaruri hai KHud bhi kuchh inkishaf kare

purane waqton ke kuchh log ab bhi kahte hain

baDa wahi hai jo dushman ko bhi muaf kare

wo mera dost bhi munsif bhi hai magar 'aKHtar'

har ek faisla mere hi kyun KHilaf kare