اگر دل ہم سے دیوانے نہ دیں گے

اگر دل ہم سے دیوانے نہ دیں گے

تو دے گا کون فرزانے نہ دیں گے

تمہیں اب دل میں ہم آنے نہ دیں گے

اگر آئے تو پھر جانے نہ دیں گے

بتا اے شمع کس غم میں جلے گی

اگر جاں تجھ پہ پروانے نہ دیں گے

کہاں ہوں گے بھلا تعمیر کعبے

جگہ ان کو جو مے خانے نہ دیں گے

رہے گی دل ہی دل میں بات دل کی

کسی کو ہم یہ افسانے نہ دیں گے

بہت دیکھا ہے ہم نے ان کا وعدہ

انہیں اب دل کو بہکانے نہ دیں گے

وہ شمع رو اگر محفل میں آئے

تو اس کو راہ پروانے نہ دیں گے

تری محفل میں اہل دل اگر ہیں

تو کیا وہ دل کے نذرانے نہ دیں گے

ملیں گے آپ بھی دست تأسف

اگر ہم کو سکوں پانے نہ دیں گے

تری محفل میں جو سردار ٹھہرے

وہی اک سر کے نذرانے نہ دیں گے

امرؔ ہوتے ہیں وہ بھی ایک صیاد

جو دانہ ڈال کر کھانے نہ دیں گے