اگر ایک غم کو بھلا دیا تو غم دگر کی تلاش ہے

اگر ایک غم کو بھلا دیا تو غم دگر کی تلاش ہے

نہ دعا کو ہاتھ اٹھے کبھی نہ مجھے اثر کی تلاش ہے

وہی ظلمتیں وہی سوز و درد مگر اثر ہے جدا جدا

تجھے پھر شکایت شام غم مجھے پھر سحر کی تلاش ہے

جسے امتیاز سفر نہ ہو ہے وہی علامت گمرہی

اسے کارواں میں جگہ نہ دو جسے راہبر کی تلاش ہے

جو دلوں کے راز بتا سکے مجھے چاہئے وہ شعور غم

جو افق کے پار بھی جا سکے مجھے اس نظر کی تلاش ہے

مری منزلیں مرے سامنے مرا زاد راہ مری نظر

کوئی راہزن ہو کہ راہبر مجھے ہم سفر کی تلاش ہے

مرا ذوق پردہ نشیں نہیں مری کائنات حسیں نہیں

ترا حسن خوب سہی مگر مجھے خوب تر کی تلاش ہے