agar himmat jawan ho shadmani DhunD leti hai

agar himmat javāñ ho shādmānī DhūñD letī hai

zarūrat tapte sahrā meñ bhī paanī DhūñD letī hai

kisī rangīn manzar tak rasā.ī jab nahīñ hotī

nazar afsurda manzar meñ javānī DhūñD letī hai

hadoñ se baḌhne lagtī hai ghuTan jab dīda-o-dil kī

tarīqa guftugū kā be-zabānī DhūñD letī hai

numā.ish dil ke zaḳhmoñ kī chalo dillī meñ karte haiñ

sunā hai qātiloñ ko rājdhānī DhūñD letī hai

masā.il kā kabhī hal DhūñDne par bhī nahīñ miltā

masā.il kā kabhī hal zindagānī DhūñD letī hai

kisī ko qissa-e-dil jab sunānā chāhtā huuñ maiñ

bahāne be-ruḳhī ke bad-gumānī DhūñD letī hai

koī uftād jab bhī TūTtī hai zindagānī par

mujhī ko kyoñ barā-e-nauha-ḳhvānī DhūñD letī hai

haqīqat se agar rishta ho us kā to 'kamāl-anvar'

ḳhud apne paḌhne vāloñ ko kahānī DhūñD letī hai

agar himmat jawan ho shadmani DhunD leti hai

zarurat tapte sahra mein bhi pani DhunD leti hai

kisi rangin manzar tak rasai jab nahin hoti

nazar afsurda manzar mein jawani DhunD leti hai

hadon se baDhne lagti hai ghuTan jab dida-o-dil ki

tariqa guftugu ka be-zabani DhunD leti hai

numaish dil ke zaKHmon ki chalo dilli mein karte hain

suna hai qatilon ko rajdhani DhunD leti hai

masail ka kabhi hal DhunDne par bhi nahin milta

masail ka kabhi hal zindagani DhunD leti hai

kisi ko qissa-e-dil jab sunana chahta hun main

bahane be-ruKHi ke bad-gumani DhunD leti hai

koi uftad jab bhi TuTti hai zindagani par

mujhi ko kyon bara-e-nauha-KHwani DhunD leti hai

haqiqat se agar rishta ho us ka to 'kamal-anwar'

KHud apne paDhne walon ko kahani DhunD leti hai