agar ho zarf se Khaali to kya rakkha hai dariya mein

agar ho zarf se ḳhālī to kyā rakkhā hai dariyā meñ

samundar ko bhī maiñ ne Dūbte dekhā hai qatra meñ

ujāle DhūñDne vaale ujāle DhūñD lete haiñ

añdherā hai magar kuchh raushnī ab bhī hai duniyā meñ

jo haa.il rāste meñ haiñ vo parbat Duub jā.eñge

tire ġham ke samundar meñ mire aañsū ke dariyā meñ

hazāroñ phuul meñ ham bhī to haiñ ik phuul hī lekin

hamāre baad ye ḳhushbū na mil pā.egī duniyā meñ

badan-sāgar meñ utreñ kashtiyāñ kyā merī āñkhoñ kī

talātum aur baḌhtā jā rahā hai mauj-e-dariyā meñ

sitāre chāñd sūraj kahkashāñ bhī ḳhūbsūrat haiñ

magar kuchh baat hai jānam tire husn-e-sarāpā meñ

'fahīm' un ko mirā tarz-e-bayāñ achchhā nahīñ lagtā

rivāyat saañs letī hai mire ash.ār-e-tāza meñ

agar ho zarf se KHali to kya rakkha hai dariya mein

samundar ko bhi main ne Dubte dekha hai qatra mein

ujale DhunDne wale ujale DhunD lete hain

andhera hai magar kuchh raushni ab bhi hai duniya mein

jo hail raste mein hain wo parbat Dub jaenge

tere gham ke samundar mein mere aansu ke dariya mein

hazaron phul mein hum bhi to hain ek phul hi lekin

hamare baad ye KHushbu na mil paegi duniya mein

badan-sagar mein utren kashtiyan kya meri aankhon ki

talatum aur baDhta ja raha hai mauj-e-dariya mein

sitare chand suraj kahkashan bhi KHubsurat hain

magar kuchh baat hai jaanam tere husn-e-sarapa mein

'fahim' un ko mera tarz-e-bayan achchha nahin lagta

riwayat sans leti hai mere ashaar-e-taza mein