agar itna na tu ayyar hota

agar itnā na tū ayyār hotā

to dushman kā na hargiz yaar hotā

duī kā naqsh miTtā dil se ai kaash

mai-e-vahdat se maiñ sarshār hotā

jo hote āj-kal qais aur farhād

maiñ un kā qāfila-sālār hotā

na hotā gar tirā tālib jahāñ meñ

to maiñ pāband-e-nañg-o-ār hotā

lagā.e chaaT par haiñ us ko dushman

ilāhī maiñ bhī kuchh zardār hotā

agar hotā mujhe paas aabrū kā

na terā āshiq-e-dīdār hotā

taḌaptā hai qafas meñ tā.ir-e-dil

nikal jaatā agar par-dār hotā

tamannā dil kī 'sāqī' jab nikaltī

agar muñh se na kuchh iz.hār hotā

agar itna na tu ayyar hota

to dushman ka na hargiz yar hota

dui ka naqsh miTta dil se ai kash

mai-e-wahdat se main sarshaar hota

jo hote aaj-kal qais aur farhad

main un ka qafila-salar hota

na hota gar tera talib jahan mein

to main paband-e-nang-o-ar hota

lagae chaT par hain us ko dushman

ilahi main bhi kuchh zardar hota

agar hota mujhe pas aabru ka

na tera aashiq-e-didar hota

taDapta hai qafas mein tair-e-dil

nikal jata agar par-dar hota

tamanna dil ki 'saqi' jab nikalti

agar munh se na kuchh izhaar hota