agar izzat mile to sar takabbur se uThana mat

agar izzat mile to sar takabbur se uThānā mat

kisī kī ḳhaak ko tum apne pairoñ se uḌānā mat

ye nafrat bhī mohabbat kā purānā ruup lagtī hai

mohabbat ruup badle to kabhī dhoke meñ aanā mat

agar ye ban gayā to phir tumheñ hī baañT khā.egā

jo dariyā ishq kā hai us pe koī ghar banānā mat

buzurgoñ ne kahā hai ye hamesha jhuk ke chalnā tum

magar majnūñ ye kahtā he kabhī sar ko jhukānā mat

ye pardesī yahāñ par muddatoñ ke baad aa.e haiñ

mohabbat se inheñ milnā kabhī in ko satānā mat

mohabbat kī vo taḳhtī jis pe apne naam likkhe the

ise rakhnā muqaddam tum kabhī is ko miTānā mat

mohabbat farz hai aur tum bhī puurā farz kar lenā

diyā hai ye mazāroñ kā kabhī is ko bujhānā mat

virāsat meñ mirā hissa bhale bhaa.ī tū rakh lenā

amānat hai ye purkhoñ kī kabhī is ko gañvānā mat

isī gaañv kī miTTī se milā hai ham ko ye rutba

kabhī shahroñ meñ apnā ghar mire beTe basānā mat

duā jaisā asar hotā hai 'nāsir' badduā meñ bhī

kisī sūrat bhī duniyā meñ kisī kā dil dukhānā mat

agar izzat mile to sar takabbur se uThana mat

kisi ki KHak ko tum apne pairon se uDana mat

ye nafrat bhi mohabbat ka purana rup lagti hai

mohabbat rup badle to kabhi dhoke mein aana mat

agar ye ban gaya to phir tumhein hi banT khaega

jo dariya ishq ka hai us pe koi ghar banana mat

buzurgon ne kaha hai ye hamesha jhuk ke chalna tum

magar majnun ye kahta he kabhi sar ko jhukana mat

ye pardesi yahan par muddaton ke baad aae hain

mohabbat se inhen milna kabhi in ko satana mat

mohabbat ki wo taKHti jis pe apne nam likkhe the

ise rakhna muqaddam tum kabhi is ko miTana mat

mohabbat farz hai aur tum bhi pura farz kar lena

diya hai ye mazaron ka kabhi is ko bujhana mat

wirasat mein mera hissa bhale bhai tu rakh lena

amanat hai ye purkhon ki kabhi is ko ganwana mat

isi ganw ki miTTi se mila hai hum ko ye rutba

kabhi shahron mein apna ghar mere beTe basana mat

dua jaisa asar hota hai 'nasir' baddua mein bhi

kisi surat bhi duniya mein kisi ka dil dukhana mat