اگر جانا ضروری تھا تو چپکے سے چلے جاتے

اگر جانا ضروری تھا تو چپکے سے چلے جاتے

کہ اک خوش فہمی سی رہتی سہارے جس کے جی پاتے

ابھی بھی وقت لگتا ہے ابھی بھی فن نہیں کامل

اگرچہ عمر گزری ہے ہمیں اس دل کو بہلاتے

رہو اپنے ہی گھر میں تم پرائے فرد کے مانند

ستم دیکھو تقاضہ ہے رہو اس پر بھی اتراتے

سماعت نے ڈبویا ہے گلوں کی سسکیاں سن کر

نہ کانوں تک صدا آتی نہ آنسو آنکھ تک آتے

یہ عہد کم نگاہی ہے یہاں شکوہ نہیں کافی

کہاں شکوے شکایت ہیں کسی پتھر کو کمھلاتے