اگر مجھ سے مری کچھ آتش غم کم نہیں ہوتی

اگر مجھ سے مری کچھ آتش غم کم نہیں ہوتی

کوئی تدبیر تجھ سے بھی تو چشم نم نہیں ہوتی

برا ہو سوزش دل کا برا ہو سوز فرقت کا

لگی ہے آگ وہ دل میں کبھی جو کم نہیں ہوتی

تصور ہو کسی کا دل میں یا راتیں جدائی کی

خلش تیری کبھی اے سوز فرقت کم نہیں ہوتی

بت کافر ادا تجھ سے تری تصویر اچھی ہے

مری روداد غم سن کر کبھی برہم نہیں ہوتی

چلیں باد خزاں کے رات دن جھونکے گلستاں میں

محبت وہ کلی ہے جس کی خوشبو کم نہیں ہوتی

کروں تو کیا کروں تدبیر میں اس سوز فرقت کی

بجھانے پر بھی میری آتش غم کم نہیں ہوتی

تڑپنا دیکھتی رہتی ہے میرا رازؔ فرقت میں

شب غم تو بھی قسمت سے مری ہمدم نہیں ہوتی