agar mujhse meri kuchh aatish-e-gham kam nahin hoti

agar mujh se mirī kuchh ātish-e-ġham kam nahīñ hotī

koī tadbīr tujh se bhī to chashm-e-nam nahīñ hotī

burā ho sozish-e-dil kā burā ho soz-e-furqat kā

lagī hai aag vo dil meñ kabhī jo kam nahīñ hotī

tasavvur ho kisī kā dil meñ yā rāteñ judā.ī kī

ḳhalish terī kabhī ai soz-e-furqat kam nahīñ hotī

but-e-kāfir-adā tujh se tirī tasvīr achchhī hai

mirī rūdād-e-ġham sun kar kabhī barham nahīñ hotī

chaleñ bād-e-ḳhizāñ ke rāt-din jhoñke gulistāñ meñ

mohabbat vo kalī hai jis kī ḳhushbū kam nahīñ hotī

karūñ to kyā karūñ tadbīr maiñ is soz-e-furqat kī

bujhāne par bhī merī ātish-e-ġham kam nahīñ hotī

taḌapnā dekhtī rahtī hai merā 'rāz' furqat meñ

shab-e-ġham tū bhī qismat se mirī hamdam nahīñ hotī

agar mujh se meri kuchh aatish-e-gham kam nahin hoti

koi tadbir tujh se bhi to chashm-e-nam nahin hoti

bura ho sozish-e-dil ka bura ho soz-e-furqat ka

lagi hai aag wo dil mein kabhi jo kam nahin hoti

tasawwur ho kisi ka dil mein ya raaten judai ki

KHalish teri kabhi ai soz-e-furqat kam nahin hoti

but-e-kafir-ada tujh se teri taswir achchhi hai

meri rudad-e-gham sun kar kabhi barham nahin hoti

chalen baad-e-KHizan ke raat-din jhonke gulistan mein

mohabbat wo kali hai jis ki KHushbu kam nahin hoti

karun to kya karun tadbir main is soz-e-furqat ki

bujhane par bhi meri aatish-e-gham kam nahin hoti

taDapna dekhti rahti hai mera 'raaz' furqat mein

shab-e-gham tu bhi qismat se meri hamdam nahin hoti