agar na roen to aankhon pe bojh paDta hai

agar na ro.eñ to āñkhoñ pe bojh paḌtā hai

kareñ jo girya to rātoñ pe bojh paḌtā hai

parinde chhoḌ ke tanhā agar chale jaa.eñ

to phir daraḳht kī shāḳhoñ pe bojh paḌtā hai

ḳhatā-e-ishq ko ab sirf sochne bhar se

hamārī ruuh ke chhāloñ pe bojh paḌtā hai

ye chāñd kartā hai ārām jab amāvas meñ

siyāh raat meñ tāroñ pe bojh paḌtā hai

tum in ko ilm do lekin ye ehtiyāt rakho

ho bhārī basta to bachchoñ pe bojh paḌtā hai

sukūt itnā hameñ raas aa gayā hai ki ab

jo kuchh suneñ bhī to kānoñ pe bojh paḌtā hai

tumhārī yaad kī ujḌī huī havelī meñ

hai itnī dhuul ki sāñsoñ pe bojh paḌtā hai

ham is ḳhayāl se hijrat bhī kar nahīñ sakte

qadam baḌhā.eñ to rāhoñ pe bojh paḌtā hai

agar na roen to aankhon pe bojh paDta hai

karen jo girya to raaton pe bojh paDta hai

parinde chhoD ke tanha agar chale jaen

to phir daraKHt ki shaKHon pe bojh paDta hai

KHata-e-ishq ko ab sirf sochne bhar se

hamari ruh ke chhaalon pe bojh paDta hai

ye chand karta hai aaram jab amawas mein

siyah raat mein taron pe bojh paDta hai

tum in ko ilm do lekin ye ehtiyat rakho

ho bhaari basta to bachchon pe bojh paDta hai

sukut itna hamein ras aa gaya hai ki ab

jo kuchh sunen bhi to kanon pe bojh paDta hai

tumhaari yaad ki ujDi hui haweli mein

hai itni dhul ki sanson pe bojh paDta hai

hum is KHayal se hijrat bhi kar nahin sakte

qadam baDhaen to rahon pe bojh paDta hai