اگر شانے پہ دن کے رات کا پرچم نہیں ہوتا

اگر شانے پہ دن کے رات کا پرچم نہیں ہوتا

یہ عالم کچھ بھی ہوتا خوش نما عالم نہیں ہوتا

کسی صورت ٹپکتا زخم دل کا کم نہیں ہوتا

یہ زخم دل ہے یہ منت کش مرہم نہیں ہوتا

مسرت سے مسرت اور غم سے غم نہیں ہوتا

عجب ہوتا ہے عالم جب کوئی عالم نہیں ہوتا

بھروسہ ناخدا پہ کرنے والا ڈوب جاتا ہے

پکارے جو خدا کو غرق موج یم نہیں ہوتا

شہادت پائی ہے دل نے فدائے گل رخاں ہو کر

شہیدوں کا ہمارے دین میں ماتم نہیں ہوتا

زہے قسمت کہ آغوش حرم ہے اور ہم ورنہ

گناہوں کا صلہ تو ساغر زمزم نہیں ہوتا

نعیمؔ اپنا لیا ہے ہم نے غم سارے زمانے کا

کہ جب حد سے گزر جاتا ہے غم پھر غم نہیں ہوتا