agar sun le kahin be-mehr tu bhi dastan meri

agar sun le kahīñ be-mehr tū bhī dāstāñ merī

jigar ke paar ho jaa.e tire tarz-e-bayāñ merī

kabhī jo sadma-e-furqat se maiñ ne aah kī ai dil

zamāna ko hilā Dālegī ye āh-o-fuġhāñ merī

zamīñ kāñpe agar ma.alūm ho hālat mirī us ko

falak tharrā.e gir sun le kisī se dāstāñ merī

nigāheñ DhūñDhtī haiñ har taraf sub.h-o-masā tujh ko

ajab zālim hai tū rahtā hai nazroñ se nihāñ merī

judā.ī meñ jalegā terī misl-e-sham.a dil merā

agar kī battiyāñ ban kar jaleñgī haDDiyāñ merī

na din ko chain miltā hai na shab ko niiñd aatī hai

tirī furqat meñ ye hālat huī jān-e-jahāñ merī

ġham-e-furqat meñ hamdam haal merā pūchhtā kyā hai

nazar rahtī hai har saa.at ba-sū-e-āsmāñ merī

jahāñ meñ hai zabān-e-ḳhalq par har-dam but-e-ḳhud-sar

jafā terī vafā merī sitam terā fuġhāñ merī

ḳhudārā ik nigāh-e-lutf ho 'unsī' kī jānib bhī

ye kahte kahte tujh se sang-dil sūkhī zabāñ merī

agar sun le kahin be-mehr tu bhi dastan meri

jigar ke par ho jae tere tarz-e-bayan meri

kabhi jo sadma-e-furqat se main ne aah ki ai dil

zamana ko hila Dalegi ye aah-o-fughan meri

zamin kanpe agar malum ho haalat meri us ko

falak tharrae gir sun le kisi se dastan meri

nigahen DhunDhti hain har taraf subh-o-masa tujh ko

ajab zalim hai tu rahta hai nazron se nihan meri

judai mein jalega teri misl-e-shama dil mera

agar ki battiyan ban kar jalengi haDDiyan meri

na din ko chain milta hai na shab ko nind aati hai

teri furqat mein ye haalat hui jaan-e-jahan meri

gham-e-furqat mein hamdam haal mera puchhta kya hai

nazar rahti hai har saat ba-su-e-asman meri

jahan mein hai zaban-e-KHalq par har-dam but-e-KHud-sar

jafa teri wafa meri sitam tera fughan meri

KHudara ek nigah-e-lutf ho 'unsi' ki jaanib bhi

ye kahte kahte tujh se sang-dil sukhi zaban meri