agar wo jhuT bhi bole to hum sach man lete hain

agar vo jhuuT bhī bole to ham sach maan lete haiñ

naqāboñ meñ chhupe chehroñ ko ham pahchān lete haiñ

zarūrat tiir yā talvār kī un ko nahīñ hotī

nazar kī maar se vo āshiqoñ kī jaan lete haiñ

vahāñ to jis ko bhī jaanā hai ḳhālī haath jaanā hai

na jaane log phir kyoñ is qadar sāmān lete haiñ

ināyat kī karam kī ik nazar karte haiñ badle meñ

kabhī vo jaan lete haiñ kabhī īmān lete haiñ

irāde par aTal rahte haiñ ai 'āġhāz' ham apne

vahī sab kar guzarte haiñ jo man meñ Thaan lete haiñ

agar wo jhuT bhi bole to hum sach man lete hain

naqabon mein chhupe chehron ko hum pahchan lete hain

zarurat tir ya talwar ki un ko nahin hoti

nazar ki mar se wo aashiqon ki jaan lete hain

wahan to jis ko bhi jaana hai KHali hath jaana hai

na jaane log phir kyon is qadar saman lete hain

inayat ki karam ki ek nazar karte hain badle mein

kabhi wo jaan lete hain kabhi iman lete hain

irade par aTal rahte hain ai 'aghaz' hum apne

wahi sab kar guzarte hain jo man mein Than lete hain