اگر ذرا بھی کسی سر کا ذکر ہوتا ہے

اگر ذرا بھی کسی سر کا ذکر ہوتا ہے

تو زور شور سے پتھر کا ذکر ہوتا ہے

امیر شہر کے تالاب کے کنارے پر

دبی زباں میں سمندر کا ذکر ہوتا ہے

جلا کے ایک شکستہ چراغ ناکامی

تمام رات مقدر کا ذکر ہوتا ہے

وہ جس کے سامنے دوچار پل ٹھہر جائے

تو آسمان میں اس گھر کا ذکر ہوتا ہے

تمہاری بزم میں جنت کی بات ہوتی ہے

ہماری بزم میں محشر کا ذکر ہوتا ہے

غریب روتے ہیں پہلے تو خالی ہاتھوں پر

پھر اس کے بعد سکندر کا ذکر ہوتا ہے

تمام شہر کے دروازہ بول اٹھتے ہیں

گلی گلی میں ترے در کا ذکر ہوتا ہے