agarche bagh-o-chaman ki bahaar hai ghuncha

agarche bāġh-o-chaman kī bahār hai ġhuncha

pe tū na ho.e to nazroñ meñ ḳhaar hai ġhuncha

lagī hai teġh-e-nigah kis kī ye batā bulbul

ki TukḌe hai jigar-e-gul figār hai ġhuncha

jale hai is liye dil bulbuloñ kā ai gul-rū

ki tere mukhḌe pe jī se nisār hai ġhuncha

tire laboñ se jo tashbīh dījiye to ġhalat

yuuñ apnī tarah meñ rangīñ hazār hai ġhuncha

hañsā hai tū magar us ke dahan pe ai gul-rū

jo munfa.il basar-e-shāḳh-sār hai ġhuncha

zarūr kyā hai jo gulshan meñ jaa.eñ chhoḌ tujhe

tirā hī muñh hameñ ai gul-ezār hai ġhuncha

tū us kā bosa jo letā hai dam-ba-dam 'afsos'

kisī dahan kā magar yādgār hai ġhuncha

agarche bagh-o-chaman ki bahaar hai ghuncha

pe tu na hoe to nazron mein KHar hai ghuncha

lagi hai tegh-e-nigah kis ki ye bata bulbul

ki TukDe hai jigar-e-gul figar hai ghuncha

jale hai is liye dil bulbulon ka ai gul-ru

ki tere mukhDe pe ji se nisar hai ghuncha

tere labon se jo tashbih dijiye to ghalat

yun apni tarah mein rangin hazar hai ghuncha

hansa hai tu magar us ke dahan pe ai gul-ru

jo munfail basar-e-shaKH-sar hai ghuncha

zarur kya hai jo gulshan mein jaen chhoD tujhe

tera hi munh hamein ai gul-ezar hai ghuncha

tu us ka bosa jo leta hai dam-ba-dam 'afsos'

kisi dahan ka magar yaadgar hai ghuncha