agarche dushwar tha magar zer kar liya tha

agarche dushvār thā magar zer kar liyā thā

anā kā rasta sahl samajh kar jo sar liyā thā

vo kahkashāoñ kī had se aage kahīñ basā hai

talab meñ jis kī zamīñ pe bosīda ghar liyā thā

guloñ kī chāhat meñ ek din kyā bichhāyā hogā

ki ham ne kāñToñ se apnā dāmān bhar liyā thā

baḌhāyā us ne jo garm-joshī se haath yaaro

nahīñ thā maslak agarche nazrāna par liyā thā

usī kā baḳhshā huā thā sab kuchh to der kaisī

bas ik ishāre pe kāsa-e-jān dhar liyā thā

dil-e-shikasta kī muddatoñ tak ḳhabar na aa.ī

khulā ki muTThī meñ tū ne ai fitna-gar liyā thā

'adū ne chāloñ se chit kiyā hai 'rashīd-hasrat'

vagarna ham ne bhī asp to nāmvar liyā thā

agarche dushwar tha magar zer kar liya tha

ana ka rasta sahl samajh kar jo sar liya tha

wo kahkashaon ki had se aage kahin basa hai

talab mein jis ki zamin pe bosida ghar liya tha

gulon ki chahat mein ek din kya bichhaya hoga

ki hum ne kanTon se apna daman bhar liya tha

baDhaya us ne jo garm-joshi se hath yaro

nahin tha maslak agarche nazrana par liya tha

usi ka baKHsha hua tha sab kuchh to der kaisi

bas ek ishaare pe kasa-e-jaan dhar liya tha

dil-e-shikasta ki muddaton tak KHabar na aai

khula ki muTThi mein tu ne ai fitna-gar liya tha

'adu ne chaalon se chit kiya hai 'rashid-hasrat'

wagarna hum ne bhi asp to namwar liya tha