agarche ghair ke hathon lahuluhan hua

agarche ġhair ke hāthoñ lahūluhān huā

magar maiñ apnī taraf se bhī bad-gumān huā

jo paḌ gayā thā kabhī ḳhud mirī nigāhoñ par

vo ek parda mire haq meñ āsmān huā

vo jis ke vāste duniyā thī gosh-bar-āvāz

vo mājrā mirī āñkhoñ hī se bayān huā

talāsh us kī thī maqsūd dair-o-kā'ba kyā

hamārā ruḳh thā jidhar us kā ik nishān huā

hamāre zarf ko kyā āzmāte ahl-e-havas

isī bahāne ḳhud un kā bhī imtihān huā

bahut malūl the jis dāman-e-darīda par

vahī safīna-e-hastī kā bādbān huā

azal se thā vo hamāre vujūd kā hissa

vo ek shaḳhs ki jo ham pe mehrbān huā

zarā jo tez chale ham to koī saath na thā

hisār-e-fikr hī bas apnā pāsbān huā

agarche ghair ke hathon lahuluhan hua

magar main apni taraf se bhi bad-guman hua

jo paD gaya tha kabhi KHud meri nigahon par

wo ek parda mere haq mein aasman hua

wo jis ke waste duniya thi gosh-bar-awaz

wo majra meri aankhon hi se bayan hua

talash us ki thi maqsud dair-o-ka'ba kya

hamara ruKH tha jidhar us ka ek nishan hua

hamare zarf ko kya aazmate ahl-e-hawas

isi bahane KHud un ka bhi imtihan hua

bahut malul the jis daman-e-darida par

wahi safina-e-hasti ka baadban hua

azal se tha wo hamare wujud ka hissa

wo ek shaKHs ki jo hum pe mehrban hua

zara jo tez chale hum to koi sath na tha

hisar-e-fikr hi bas apna pasban hua