agarche hadse guzre hain paniyon ki tarah

agarche hādse guzre haiñ pāniyoñ kī tarah

ḳhamosh rah ga.e ham log sāhiloñ kī tarah

kisī ke sāmne maiñ kis liye zabāñ kholūñ

milī hai apnī anā mujh ko dushmanoñ kī tarah

tire baġhair nazar aa.e haiñ mujhe aksar

makān ke dar-o-dīvār qātiloñ kī tarah

na jaane kaun sī manzil ko chal diye patte

bhaTak rahī haiñ havā.eñ musāfiroñ kī tarah

hamīñ ne khol ke lab ruuh phūñk dī varna

tamām harf the be-jān pattharoñ kī tarah

maiñ ro rahā thā shab-e-ġham kī zulmatoñ se bahut

ḳhudā kā shukr jale zaḳhm mish.aloñ kī tarah

yahī to 'kaif' hasad hai ki dil bhī yāroñ ke

siyāh ho ga.e likkhe hue ḳhatoñ kī tarah

agarche hadse guzre hain paniyon ki tarah

KHamosh rah gae hum log sahilon ki tarah

kisi ke samne main kis liye zaban kholun

mili hai apni ana mujh ko dushmanon ki tarah

tere baghair nazar aae hain mujhe aksar

makan ke dar-o-diwar qatilon ki tarah

na jaane kaun si manzil ko chal diye patte

bhaTak rahi hain hawaen musafiron ki tarah

hamin ne khol ke lab ruh phunk di warna

tamam harf the be-jaan pattharon ki tarah

main ro raha tha shab-e-gham ki zulmaton se bahut

KHuda ka shukr jale zaKHm mishalon ki tarah

yahi to 'kaif' hasad hai ki dil bhi yaron ke

siyah ho gae likkhe hue KHaton ki tarah