agarche kahne ko kal kaenat apni thi

agarche kahne ko kal kā.enāt apnī thī

haqīqatan kahāñ apnī bhī zaat apnī thī

kaheñ to kis se kaheñ ham hayāt apnī thī

na koī din thā hamārā na raat apnī thī

koī bhī aaj to apnā nazar nahīñ aatā

jo tum the apne to kul kā.enāt apnī thī

ye kyā ki aaj koī naam tak nahīñ letā

vo din bhī the ki har ik lab pe baat apnī thī

hamāre paas rahā kyā hai ab ġhamoñ ke sivā

vo din ga.e ki rah-e-shash-jihāt apnī thī

hamīñ se bhuul kahīñ ho ga.ī mohabbat meñ

vagarna vo nigah-e-iltifāt apnī thī

jo tum qarīb the har shai pe iḳhtiyār sā thā

ye chāñd aur sitāroñ kī raat apnī thī

hameñ ḳhud apnī ḳhirad kā ġhurūr le Duubā

nahīñ to ek zamāne meñ baat apnī thī

'hayāt' is liye nazm-e-kuhan ko toḌ diyā

ki aaj sirf isī meñ najāt apnī thī

agarche kahne ko kal kaenat apni thi

haqiqatan kahan apni bhi zat apni thi

kahen to kis se kahen hum hayat apni thi

na koi din tha hamara na raat apni thi

koi bhi aaj to apna nazar nahin aata

jo tum the apne to kul kaenat apni thi

ye kya ki aaj koi nam tak nahin leta

wo din bhi the ki har ek lab pe baat apni thi

hamare pas raha kya hai ab ghamon ke siwa

wo din gae ki rah-e-shash-jihat apni thi

hamin se bhul kahin ho gai mohabbat mein

wagarna wo nigah-e-iltifat apni thi

jo tum qarib the har shai pe iKHtiyar sa tha

ye chand aur sitaron ki raat apni thi

hamein KHud apni KHirad ka ghurur le Duba

nahin to ek zamane mein baat apni thi

'hayat' is liye nazm-e-kuhan ko toD diya

ki aaj sirf isi mein najat apni thi