agarche maine likhin usko arziyan bhi bahut

agarche maiñ ne likhīñ us ko arziyāñ bhī bahut

uḌā.īñ us ne magar un kī dhajjiyāñ bhī bahut

milegā fā.eda kuchh ziist ke safar meñ mujhe

agarche is meñ hai adnesha-e-ziyāñ bhī bahut

mire qarīb jab aaoge jaan jāoge

burā.iyāñ haiñ agar mujh meñ ḳhūbiyāñ bhī bahut

baḌe dukhoñ meñ guzārī hai zindagī phir bhī

jahāñ maiñ chhoḌī haiñ ham ne kahāniyāñ bhī bahut

dikhā.ī dete haiñ kuchh phuul ab bhī shāḳhoñ par

bikher dī haiñ havāoñ ne pattiyāñ bhī bahut

ye aur baat hai mahfūz bijliyoñ se na the

mirī nigāh meñ the yuuñ to āshiyāñ bhī bahut

hamārī dostī ai dost shak kī zad meñ hai

haiñ qurbateñ bhī bahut ham meñ dūriyāñ bhī bahut

masarratoñ kī talab meñ jo ghar se niklā thā

usī ke hisse meñ aa.eñ udāsiyāñ bhī bahut

abhī to habs hai mushkil hai saañs lenā bhī

havā chalī to phir ā.eñgī āñdhiyāñ bhī bahut

ġhazab kā husn sahī terī sādgī meñ magar

pasand haiñ mujhe ai dost shoḳhiyāñ bhī bahut

mirā ḳhayāl hai pā lūñgā maiñ 'rashīd' use

mire ḳhayāl meñ lekin haiñ ḳhāmiyāñ bhī bahut

agarche main ne likhin us ko arziyan bhi bahut

uDain us ne magar un ki dhajjiyan bhi bahut

milega faeda kuchh zist ke safar mein mujhe

agarche is mein hai adnesha-e-ziyan bhi bahut

mere qarib jab aaoge jaan jaoge

buraiyan hain agar mujh mein KHubiyan bhi bahut

baDe dukhon mein guzari hai zindagi phir bhi

jahan main chhoDi hain hum ne kahaniyan bhi bahut

dikhai dete hain kuchh phul ab bhi shaKHon par

bikher di hain hawaon ne pattiyan bhi bahut

ye aur baat hai mahfuz bijliyon se na the

meri nigah mein the yun to aashiyan bhi bahut

hamari dosti ai dost shak ki zad mein hai

hain qurbaten bhi bahut hum mein duriyan bhi bahut

masarraton ki talab mein jo ghar se nikla tha

usi ke hisse mein aaen udasiyan bhi bahut

abhi to habs hai mushkil hai sans lena bhi

hawa chali to phir aaengi aandhiyan bhi bahut

ghazab ka husn sahi teri sadgi mein magar

pasand hain mujhe ai dost shoKHiyan bhi bahut

mera KHayal hai pa lunga main 'rashid' use

mere KHayal mein lekin hain KHamiyan bhi bahut