agarche rah mein koh-e-giran the

agarche raah meñ koh-e-girāñ the

magar ham bhī to kitne saḳht-jāñ the

charāġh-e-anjuman samjhe the jin ko

zarā nazdīk se dekhā dhuāñ the

ye ilm-o-fan ke saare ābgīne

sar-e-bāzār jins-e-rā.egāñ the

ye dil kaise lagegā lā-makāñ meñ

mirī bastī meñ sab kaun-o-makāñ the

havelī aur urdu saath ujḌe

yahāñ pahle baḌe ahl-e-zabāñ the

bahut din baad aa.e mai-kade meñ

vo saaqī thā na vo pīr-e-muġhāñ the

agarche rah mein koh-e-giran the

magar hum bhi to kitne saKHt-jaan the

charagh-e-anjuman samjhe the jin ko

zara nazdik se dekha dhuan the

ye ilm-o-fan ke sare aabgine

sar-e-bazar jins-e-raegan the

ye dil kaise lagega la-makan mein

meri basti mein sab kaun-o-makan the

haweli aur urdu sath ujDe

yahan pahle baDe ahl-e-zaban the

bahut din baad aae mai-kade mein

wo saqi tha na wo pir-e-mughan the