ahbab chhuTe mahbub chhuTe ghar chhuT gaya dar chhuT gaya

ahbāb chhuTe mahbūb chhuTe ghar chhūT gayā dar chhūT gayā

jab dil se tamanna chhūT ga.ī sab rishta naatā TuuT gayā

ai sāqī-e-bazm-e-kaif-e-hayāt ab mujh ko pyāsā jaane de

mai jis meñ mirī taqdīr kī thī vo shīsha tujh se TuuT gayā

go shīsha-gar-e-qudrat ne bahut TuuTe hue shīshe joḌ diye

lekin ye hamārā shīsha-e-dil joḌā na gayā yuuñ TuuT gayā

is saaz pe naġhma ab chheḌo to naala paidā hotā hai

maujūd haiñ vo sab taar jo the bas ek nahīñ hai TuuT gayā

ham rote haiñ apne pyāroñ ko aur fitrat ham se kahtī hai

ab aur khilaunoñ se khelo jo TuuT gayā so TuuT gayā

vo raah meñ hai āñkhoñ meñ hai dam ai bād-e-sabā āhista guzar

haiñ tār-e-nafas par hachkole ab TuuT gayā ab TuuT gayā

kahte ho ki māñgo jo māñgo batlāo tumhī ham kyā māñgeñ

chāhā thā ki māñgeñ tum se tumheñ ye ho na sakā jī chhūT gayā

haañ sun ki tujhe thī ham se ġharaz mohtāj-e-nazar thā husn tirā

rakkhī rahī shān-e-istiġhnā āḳhir ko ye bhāñDā phuuT gayā

ye dil to vahī dil hai 'rizvī' ābād bhī thā vīrān bhī hai

armānoñ kī is bastī ko kal ek musāfir luuT gayā

ahbab chhuTe mahbub chhuTe ghar chhuT gaya dar chhuT gaya

jab dil se tamanna chhuT gai sab rishta nata TuT gaya

ai saqi-e-bazm-e-kaif-e-hayat ab mujh ko pyasa jaane de

mai jis mein meri taqdir ki thi wo shisha tujh se TuT gaya

go shisha-gar-e-qudrat ne bahut TuTe hue shishe joD diye

lekin ye hamara shisha-e-dil joDa na gaya yun TuT gaya

is saz pe naghma ab chheDo to nala paida hota hai

maujud hain wo sab tar jo the bas ek nahin hai TuT gaya

hum rote hain apne pyaron ko aur fitrat hum se kahti hai

ab aur khilaunon se khelo jo TuT gaya so TuT gaya

wo rah mein hai aankhon mein hai dam ai baad-e-saba aahista guzar

hain tar-e-nafas par hachkole ab TuT gaya ab TuT gaya

kahte ho ki mango jo mango batlao tumhi hum kya mangen

chaha tha ki mangen tum se tumhein ye ho na saka ji chhuT gaya

han sun ki tujhe thi hum se gharaz mohtaj-e-nazar tha husn tera

rakkhi rahi shan-e-istighna aaKHir ko ye bhanDa phuT gaya

ye dil to wahi dil hai 'rizwi' aabaad bhi tha viran bhi hai

armanon ki is basti ko kal ek musafir luT gaya