ahd-e-KHurshid mein zarron ki haqiqat kya hai

ahd-e-ḳhurshīd meñ zarroñ kī haqīqat kyā hai

gard to aap hī chhaT jā.egī ujlat kyā hai

baat kiije jo ujāloñ kī to vo kahte haiñ

vasl kī raat ujāle kī zarūrat kyā hai

chand be-zor shajar chand khilā.e hue phuul

aur gulchīñ kī gulistāñ pe ināyat kyā hai

kūchā-e-zahr-e-faroshāñ meñ nikal aayā huuñ

kūcha-e-yār meñ suqrāt kī qīmat kyā hai

raakh ho jaate haiñ kitne hī usūloñ ke charāġh

tab kahīñ jā ke ḳhabar hotī hai shohrat kyā hai

hai mire sher meñ kuchh us kī shabāhat varna

phuul kyā chiiz haiñ kaliyoñ kī sabāhat kyā hai

dil qalandar ho to insān sitāroñ se buland

afsarī jāh-o-hasham daulat-o-shohrat kyā hai

sar vahī hai jo kisī taaj kā muhtāj na ho

zulf-e-jānāñ nazar aa.e to hukūmat kyā hai

ho jise jur.at-e-inkār mayassar 'ḳhālid'

us ko miTTī ke khilaunoñ kī zarūrat kyā hai

ahd-e-KHurshid mein zarron ki haqiqat kya hai

gard to aap hi chhaT jaegi ujlat kya hai

baat kije jo ujalon ki to wo kahte hain

wasl ki raat ujale ki zarurat kya hai

chand be-zor shajar chand khilae hue phul

aur gulchin ki gulistan pe inayat kya hai

kucha-e-zahr-e-faroshan mein nikal aaya hun

kucha-e-yar mein suqraat ki qimat kya hai

rakh ho jate hain kitne hi usulon ke charagh

tab kahin ja ke KHabar hoti hai shohrat kya hai

hai mere sher mein kuchh us ki shabahat warna

phul kya chiz hain kaliyon ki sabahat kya hai

dil qalandar ho to insan sitaron se buland

afsari jah-o-hasham daulat-o-shohrat kya hai

sar wahi hai jo kisi taj ka muhtaj na ho

zulf-e-jaanan nazar aae to hukumat kya hai

ho jise jurat-e-inkar mayassar 'KHalid'

us ko miTTi ke khilaunon ki zarurat kya hai