‘ahd-e-rifaqat kis ne toDa

‘ahd-e-rifāqat kis ne toḌā

kis ne kis ko pīchhe chhoḌā

bigḌī baat banā.ī kis ne

TuuTā rishta kis ne joḌā

mazmūñ ye bhī ġhaur-talab hai

kis ne kis kā ḳhuun nichoḌā

zālim hī zālim thā jis ne

dil sā nāzuk shīsha toḌā

dil par thā ik naaz so vo bhī

ban gayā dikhte dikhte phoḌā

lafz hī gul-pāshī karte haiñ

lafz hī ban jaate haiñ koḌā

un kī mantiq kā kyā kahnā

aage gaaḌī pīchhe ghoḌā

chaltī gaaḌī meñ kyā kahiye

jab koī aTkā.e roḌā

ābādī ko hosh na aaya

barbādī ne laakh jhiñjhoḌā

apnoñ kī be-rāh-ravī par

jitnā bhī mātam ho thoḌā

ye ilzām ġhalat hai 'hairat'

ham ne vafā se kab muñh moḌā

‘ahd-e-rifaqat kis ne toDa

kis ne kis ko pichhe chhoDa

bigDi baat banai kis ne

TuTa rishta kis ne joDa

mazmun ye bhi ghaur-talab hai

kis ne kis ka KHun nichoDa

zalim hi zalim tha jis ne

dil sa nazuk shisha toDa

dil par tha ek naz so wo bhi

ban gaya dikhte dikhte phoDa

lafz hi gul-pashi karte hain

lafz hi ban jate hain koDa

un ki mantiq ka kya kahna

aage gaDi pichhe ghoDa

chalti gaDi mein kya kahiye

jab koi aTkae roDa

aabaadi ko hosh na aaya

barbaadi ne lakh jhinjhoDa

apnon ki be-rah-rawi par

jitna bhi matam ho thoDa

ye ilzam ghalat hai 'hairat'

hum ne wafa se kab munh moDa