ahd-e-sad-maslahat-andesh nibhana paDega

ahd-e-sad-maslahat-andesh nibhānā paḌegā

muskurāne ke liye ġham ko bhulānā paḌegā

jānte haiñ ki ujaḌ jā.eñge ham andar se

mānte haiñ ki tumheñ shahr se jaanā paḌegā

āmad-e-fasl-e-bahārāñ pe koī jashn to ho

dosto dil pe koī zaḳhm khilānā paḌegā

chashm-e-bad-dūr yahī ik mirā sarmāya hai

terī yādoñ ko zamāne se chhupānā paḌegā

tumheñ jaanā hai chale jaao magar shart ye hai

ki bilā-nāġha tumheñ ḳhvāb meñ aanā paḌegā

ḳhud ko pahchān nahīñ pā.eñge chehroñ vaale

unheñ ā.īna-e-auqāt dikhānā paḌegā

nazar-andāz bhī kar sakte ho iḳhlās mirā

ye koī qarz nahīñ hai jo chukānā paḌegā

shā.irī ho to nahīñ saktī kabhī terā badal

kyā kareñ dil to kahīñ aur lagānā paḌegā

thak na jaa.e vo kahīñ ham pe sitam karte hue

'yāsir' us kā bhī hameñ haath baTānā paḌegā

ahd-e-sad-maslahat-andesh nibhana paDega

muskurane ke liye gham ko bhulana paDega

jaante hain ki ujaD jaenge hum andar se

mante hain ki tumhein shahr se jaana paDega

aamad-e-fasl-e-bahaaran pe koi jashn to ho

dosto dil pe koi zaKHm khilana paDega

chashm-e-bad-dur yahi ek mera sarmaya hai

teri yaadon ko zamane se chhupana paDega

tumhein jaana hai chale jao magar shart ye hai

ki bila-nagha tumhein KHwab mein aana paDega

KHud ko pahchan nahin paenge chehron wale

unhen aaina-e-auqat dikhana paDega

nazar-andaz bhi kar sakte ho iKHlas mera

ye koi qarz nahin hai jo chukana paDega

shairi ho to nahin sakti kabhi tera badal

kya karen dil to kahin aur lagana paDega

thak na jae wo kahin hum pe sitam karte hue

'yasir' us ka bhi hamein hath baTana paDega