ahd-e-wafa ne jaan liya intizar ko

'ahd-e-vafā ne jaan liyā intizār ko

mushkil meñ lā diyā hai bahut apne pyaar ko

kahte the vo hamāre hī mahbūb haiñ sanam

de kar bharosa toḌ diyā dil ke taar ko

zaḳhmī jigar huā hai ye nazroñ ke sāmne

ḳhush ho rahā hai dekh ke dil be-qarār ko

vā'da kiyā thā gul se satā.eñge ab nahīñ

sahrā meñ lā ke chhoḌ diyā intizār ko

badlā hai ye zamāna yā merā nasīb hai

maiñ chāhtī rahī thī baḌe shāhkār ko

kar to diyā hai tark-e-marāsim ḳhushī ḳhushī

kyā aarzū kareñ bhalā dil kī bahār ko

har aah zaḳhm detī rahī zindagī tujhe

tā-'umr phuul sā hī sañbhālā thā ḳhaar ko

jin raah se guzar ke ga.e the kabhī jo tum

mahkā rahī hai ḳhushbū vo dil ke dayār ko

kaise kare bharosa ye sonā sitāroñ kā

ḳhud chāñd bhī ye tarsā hai sūraj ke pyaar ko

'ahd-e-wafa ne jaan liya intizar ko

mushkil mein la diya hai bahut apne pyar ko

kahte the wo hamare hi mahbub hain sanam

de kar bharosa toD diya dil ke tar ko

zaKHmi jigar hua hai ye nazron ke samne

KHush ho raha hai dekh ke dil be-qarar ko

wa'da kiya tha gul se sataenge ab nahin

sahra mein la ke chhoD diya intizar ko

badla hai ye zamana ya mera nasib hai

main chahti rahi thi baDe shahkar ko

kar to diya hai tark-e-marasim KHushi KHushi

kya aarzu karen bhala dil ki bahaar ko

har aah zaKHm deti rahi zindagi tujhe

ta-'umr phul sa hi sanbhaala tha KHar ko

jin rah se guzar ke gae the kabhi jo tum

mahka rahi hai KHushbu wo dil ke dayar ko

kaise kare bharosa ye sona sitaron ka

KHud chand bhi ye tarsa hai suraj ke pyar ko