اہل دانش کی نگاہوں میں ہدف کوئی نہیں

اہل دانش کی نگاہوں میں ہدف کوئی نہیں

سر تو اب بھی ہے مگر سنگ بکف کوئی نہیں

حلقۂ کم نظراں عاقبت اندیش نہ تھا

میں اسی راہ گیا جس کی طرف کوئی نہیں

دعوائے نام و نسب سب کی زباں سے جاری

واقعہ یہ ہے کہ پابند سلف کوئی نہیں

خود نگہداری کی پاداش میں رسوا ہوئے ہم

حاصل اس کام میں تو عز و شرف کوئی نہیں

پی بھی لیتا ہوں جو مائل بہ کرم ہو وہ نگاہ

ورنہ اس خاک کے پتلے کو شغف کوئی نہیں

انجمؔ اب اہل زمانہ سے توقع کیسی

ابر نیساں کے مقدر میں صدف کوئی نہیں