ahl-e-daulat bhi kuchh log kya ho gae

ahl-e-daulat bhī kuchh log kyā ho ga.e

māl-o-zar un ke jaise ḳhudā ho ga.e

haal mat pūchhiye mujh se is daur kā

log yuuñ ġharq-e-mauj-e-balā ho ga.e

kārvāñ kaise mahfūz rah pā.egā

jo the rahzan vahī rahnumā ho ga.e

jinkī har shaam rindoñ meñ guzrī kabhī

vo bhī kuchh roz se pārsā ho ga.e

vā.iz-e-mohtaram ko sar-e-mai-kada

dekh kar log hairat-zada ho ga.e

apnā hamrāz samjhā hamesha jinheñ

vo bhī ab mujh se nā-āshnā ho ga.e

daadā 'ārif' kī shafqat kā ye faiz hai

tum jo 'hassān' naġhma-sarā ho ga.e

ahl-e-daulat bhi kuchh log kya ho gae

mal-o-zar un ke jaise KHuda ho gae

haal mat puchhiye mujh se is daur ka

log yun gharq-e-mauj-e-bala ho gae

karwan kaise mahfuz rah paega

jo the rahzan wahi rahnuma ho gae

jinki har sham rindon mein guzri kabhi

wo bhi kuchh roz se parsa ho gae

waiz-e-mohtaram ko sar-e-mai-kada

dekh kar log hairat-zada ho gae

apna hamraaz samjha hamesha jinhen

wo bhi ab mujh se na-ashna ho gae

dada 'arif' ki shafqat ka ye faiz hai

tum jo 'hassan' naghma-sara ho gae